Samkvæmt bráðabirgðatölum var útflutningur á þjónustu 379,1 milljarður árið 2012 en innflutningur á þjónustu 347,0 milljarðar. Þjónustujöfnuður við útlönd var því jákvæður um 32,2 milljarða í fyrra en 41,6 milljarða árið 2011 á gengi hvors árs.

Samgöngur skiluðu 74,2 milljarða afgangi í fyrra og ferðaþjónusta 8,0 milljarða afgangi samkvæmt bráðabirgðatölum. Á móti kom að halli var á annarri þjónustu um 50,0 milljarða.

Útflutningur á þjónustu á fjórða ársfjórðungi 2012 var, samkvæmt bráðabirgðatölum, 83,6 milljarðar króna en innflutningur á þjónustu 90,4 milljarðar. Þjónustujöfnuður við útlönd var því neikvæður um 6,8 milljarða króna á fjórða ársfjórðungi en 4,8 milljarða á sama tíma 2011 á gengi hvors árs.

Samgöngur er stærsti þjónustuliður í útflutningi og afgangur vegna þeirrar þjónustu var 11,7 milljarðar. Önnur þjónusta er stærsti liður í innflutningi og nam halli á þeirri þjónustu 10,4 milljörðum. Halli á ferðaþjónustu var 8,1 milljarður.

Tölur um þjónustujöfnuð við útlönd fyrir árið 2012 verða birtar 30. ágúst 2013 með ýtarlegri skiptingu, m.a. eftir löndum.