Útflutningur á þjónustu á öðrum ársfjórðungi 2014 var, samkvæmt bráðabirgðatölum, 122,6 milljarðar króna en innflutningur á þjónustu 88,4 milljarðar. Þjónustujöfnuður við útlönd var því jákvæður um tæpa 34,2 milljarða króna á öðrum ársfjórðungi en var jákvæður um 39,5 milljarða á sama tíma 2013 á gengi hvors árs.

Samgöngur og flutningar er stærsti þjónustuliður í útflutningi og afgangur vegna þeirrar þjónustu var 33,2 milljarðar. Ferðalög eru nú stærsti liður í innflutningi en afgangur vegna þeirra nam 11,1 milljarði. Halli var mestur af annarri viðskiptaþjónustu og nam 17,1 milljarði.

Nýir staðlar þjónustuviðskipta hafa verið teknir í notkun og þar er þjónustuskipt  í tólf flokka árið 2014 í stað þriggja flokka áður. Sambærilegar tölur hafa verið birtar fyrir árið 2013, auk nánari skiptingu flokka á undirliði þjónustu og viðskiptalönd. Breytingar vegna nýrra staðla eru eftirfarandi:

• Óbeint mæld fjármálaþjónusta (FISIM) bætist við þjónustuviðskipti. Við útflutning bætast 2,6 milljarðar en við innflutning 1,3 milljarðar.
• Framleiðsluþjónusta bætist við þjónustuviðskipti. Við útflutning bætast 5,4 milljarðar á öðrum ársfjórðungi 2014.
• Milliliðaþjónusta er ekki lengur talin með í þjónustuviðskiptum en er bætt við vöruskipti í greiðslujöfnuði. Frá útflutningi dragast 4,4 milljarðar á öðrum ársfjórðungi 2014.
• Kaup innlendra aðila (flutningsfara) á eldsneyti erlendis eru ekki lengur talin með í þjónustuviðskiptum en bætast við vöruskipti. Frá innflutningi dragast 7,2 milljarðar á öðrum ársfjórðungi 2014.

Hagstofa gefur út brúartöflu, samhliða þessari útgáfu, til að sýna breytingar á útgefnum tölum á vöru- og þjónustuviðskiptum og tölum um viðskipti eins og þau birtast í greiðslujöfnuði. Brúartaflan verður uppfærð á sama tíma og upplýsingar um þjónustuviðskipti við útlönd eru birt.

Nýir staðlar við gerð hagskýrslna
Talnaefni