Hagstofan gefur nú í fyrsta skipti út niðurstöður um þjónustuviðskipti við útlönd eftir sundurliðuðum þjónustuflokkum og ríkjum.

Á árinu 2009 var seld þjónusta til útlanda fyrir 287,3 milljarða króna en keypt var þjónusta frá útlöndum fyrir 239,9 milljarða króna. Þjónustujöfnuður var því hagstæður um 47,4 milljarða króna.

Á árinu 2009 var mest selt til útlanda og mest keypt frá útlöndum af samgöngu- og flutningaþjónustu. Samgöngu- og flutningaþjónusta var 44,5% af heildarútflutningi þjónustu og 35,5% af heildarinnflutningi þjónustu og skiluðu samgöngur 42,8 milljarða króna afgangi. Stærsti liður innan samgöngu- og flutningaþjónustu voru flugsamgöngur, eða 40,4% af heildarútflutningi og 21,6% af heildarinnflutningi. Næst samgönguþjónustu kom sala og kaup á ferðaþjónustu og er hlutur hennar af heildar þjónustuútflutningi 24,2% og 27,6% af heildar þjónustuinnflutningi. Afgangur var á ferðaþjónustu sem nam 3,3 milljörðum króna. Þriðji stærsti þjónustuliður var kaup og sala á annarri viðskiptaþjónustu, en stærsti liður þar undir var ýmis viðskipta- og tækniþjónusta. Þrír stærstu þjónustuliðirnir voru um 85% af heildarþjónustu.

Mest var selt til og keypt frá ESB af þjónustu, 60,4% af útfluttri þjónustu var selt til ESB og 57,9% af innfluttri þjónustu var keypt frá ESB. Jöfnuður þjónustu við ESB var hagstæður um 34,7 milljarða á árinu 2009. Stærsta viðskiptaland í útflutningi á þjónustu árið 2009 var Bretland og vó sala á þjónustu til Bretlands 12,0% af útfluttri þjónustu en mest var keypt af þjónustu frá Bandaríkjunum, eða um 21,1% af heildarinnflutningi á þjónustu. Þó Bretland vegi mest af einstökum löndum hvað varðar selda þjónustu var halli á þjónustuviðskiptum við Bretland um 12,3 milljarða og halli á þjónustuviðskiptum við Bandaríkin var 22,8 milljarðar á árinu 2009.

Nánari sundurliðun á þjónustuflokkum og ríkjaskiptingu má sjá á vef Hagstofunnar.