Hagstofan birtir núna í fyrsta sinn verð- og magnvísitölur fyrir vöruviðskipti við útlönd. Vísitölurnar eru birtar eftir yfirflokkum SITC-vöruflokkunarinnar (Standard International Trade Classification, 4. útg.) og verða birtar ársfjórðungslega. Vísitölurnar sýna samfellda ársfjórðungslega þróun bæði verðs og magns inn- og útflutnings frá árunum 2001 til 2017.
Vísitölur inn- og útflutnings mæla ársfjórðungslegar verðbreytingar á vöruviðskiptum við útlönd og hafa verið notaðar til staðvirðingar í þjóðhagsreikningum, til að reikna viðskiptakjör Íslands við útlönd og almennt til greiningar á utanríkisverslun. Helstu notendur vísitalnanna eru opinberir aðilar, greiningaraðilar, fyrirtæki auk almennings sem nota verð- og magnþróun vöruviðskipta við útlönd í margvíslegum tilgangi, meðal annars til efnahags- og markaðsrannsókna.
Upplýsingar um vöruviðskipti við útlönd byggjast að mestu leyti á aðflutningsskýrslum innflytjenda og útflutningsskýrslum útflytjenda auk annarra upplýsinga um vöruviðskipti við útlönd sem Hagstofa Íslands safnar reglubundið frá opinberum aðilum og fyrirtækjum.
Samhliða útgáfu á vísitölum inn- og útflutnings eru birtar árstölur um viðskiptakjör Íslands á vöruviðskiptum fyrir árin 2001-2016
Frekari upplýsingar, meðal annars um aðferðafræði, viðmunartíma talnaefnis og tíðni birtinga eru aðgengilegar í lýsigögnum.