Verðmæti þjónustuútflutnings á fyrsta ársfjórðungi 2022 er áætlað 112,9 milljarðar króna en verðmæti þjónustuinnflutnings 118,3 milljarðar. Fyrir vikið er gert ráð fyrir því að þjónustujöfnuður hafi verið neikvæður um 5,4 milljarða króna en hann var neikvæður um 8,3 milljarða á sama tíma árið áður. Á tólf mánaða tímabili, frá apríl 2021 til mars 2022, var þjónustujöfnuður jákvæður um 97,7 milljarða króna en var jákvæður um 40,2 milljarða tólf mánuðina þar á undan.
Verðmæti þjónustuútflutnings jókst um 61% á tólf mánaða tímabili
Verðmæti þjónustuútflutnings á fyrsta ársfjórðungi jókst um 53,5 milljarða króna, eða um 90%, frá fyrsta ársfjórðungi 2021 á gengi hvors árs. Útflutningstekjur af ferðalögum jukust mikið, eins og undanfarna ársfjórðunga, samanborið við fyrsta ársfjórðung 2021 eða um 35,5 milljarða. Tekjur af samgöngum og flutningum jukust um 13,1 milljarð eða um 68%. Þá jukust útflutningstekjur af fjarskipta-, tölvu- og upplýsingaþjónustu um 3,1 milljarð eða um 28%.
Verðmæti þjónustuútflutnings á tólf mánaða tímabili, frá apríl 2021 til mars 2022, var 522,2 milljarðar króna og jókst um 196,9 milljarða miðað við sama tímabil árið áður eða um 61% á gengi hvors árs. Vöxtur í útflutningstekjum af ferðalögum á sama tímabili nam 153,5 milljörðum og meira en fjórfaldaðist. Útflutningstekjur af samgöngum og flutningum jukust einnig, eða um 68%, og sömu sögu er að segja af útflutningstekjum af fjarskipta-, tölvu- og upplýsingaþjónustu sem jukust um 14%. Hins vegar drógust útflutningstekjur af annarri viðskiptaþjónustu saman um 11%.
Verðmæti þjónustuinnflutnings jókst um 49% á tólf mánaða tímabili
Verðmæti þjónustuinnflutnings á fyrsta ársfjórðungi jókst um 50,6 milljarða króna, eða um 75%, frá fyrsta ársfjórðungi 2021 á gengi hvors árs. Útgjöld vegna ferðalaga Íslendinga erlendis jukust um 23,3 milljarða og meira en þrefölduðust samanborið við fyrsta ársfjórðung 2021. Útgjöld vegna samgangna og flutninga jukust einnig nokkuð á milli ára, um 8,8 milljarða eða 63%. Sömu sögu er að segja af útgjöldum vegna annarrar viðskiptaþjónustu sem jukust um 54% á milli ára.
Verðmæti þjónustuinnflutnings á tólf mánaða tímabili, frá apríl 2021 til mars 2022, var 424,5 milljarðar króna og jókst um 139,4 milljarða miðað við sama tímabil árið áður eða um 49% á gengi hvors árs. Vó þar þyngst að útgjöld Íslendinga á ferðalögum erlendis meira en tvöfulduðust og útgjöld vegna samgangna og flutninga jukust um 45%.
Vöru- og þjónustujöfnuður neikvæður um 61,5 milljarða á tólf mánaða tímabili
Vöruútflutningur í greiðslujöfnuði* er áætlaður 242,7 milljarðar króna á fyrsta ársfjórðungi 2022 en vöruinnflutningur 262,7 milljarðar. Vöruviðskiptajöfnuður er því áætlaður neikvæður um 20 milljarða króna.
Á fyrsta ársfjórðungi 2022 er því áætlað verðmæti útflutnings vöru- og þjónustuviðskipta 355,6 milljarðar króna samanborið við 226,7 milljarða á fyrsta ársfjórðungi árið áður á gengi hvors árs. Á sama tíma er áætlað verðmæti innflutnings vöru- og þjónustuviðskipta 381 milljarður samanborið við 254,6 milljarða á sama tíma árið áður. Vöru- og þjónustujöfnuður er því áætlaður neikvæður um 25,4 milljarða króna á fyrsta ársfjórðungi 2022 en var neikvæður um 27,9 milljarða á sama tíma 2021.
Á tólf mánaða tímabili, frá apríl 2021 til mars 2022, var vöru- og þjónustujöfnuðurinn neikvæður um 61,5 milljarða króna en var neikvæður um 41,6 milljarða á tólf mánaða tímabilinu þar á undan.
Mánaðarlegur vöru- og þjónustujöfnuður
Samhliða ársfjórðungsútgáfu á vöruskipta- og þjónustujöfnuði uppfærir Hagstofan gögn um mánaðarlegan vöruskipta- og þjónustujöfnuð á fyrsta ársfjórðungi 2022. Í mars er áætlað verðmæti útflutnings vegna vöru- og þjónustuviðskipta 142,4 milljarðar króna en áætlað verðmæti innflutnings vöru- og þjónustuviðskipta 147,8 milljarðar. Fyrir vikið er gert ráð fyrir því að vöru- og þjónustujöfnuður í mars 2022 hafi verið neikvæður um 5,3 milljarða króna.
*Samkvæmt stöðlum greiðslujafnaðar og þjóðhagsreikninga.
Talnaefni
Vöru- og þjónustuviðskipti
Vöruviðskipti