Vöruskiptajöfnuður
Í marsmánuði voru fluttar út vörur fyrir 54,6 milljarða króna og inn fyrir tæpa 49,3 milljarða króna fob (53,1 milljarð króna cif). Vöruskiptin í mars, reiknuð á fob verðmæti, voru því hagstæð um tæpa 5,4 milljarða króna. Í mars 2011 voru vöruskiptin hagstæð um 14,7 milljarða króna á sama gengi¹.

Fyrstu þrjá mánuðina 2012 voru fluttar út vörur fyrir 156,1 milljarð króna en inn fyrir tæpa 128 milljarða króna fob (138,2 milljarð króna cif). Afgangur var því á vöruskiptunum við útlönd, reiknað á fob verðmæti, sem nam 28,1 milljarði en á sama tíma árið áður voru þau hagstæð um 30,3 milljarða á sama gengi¹.

Vöruskiptajöfnuðurinn var því 2,2 milljörðum króna lakari en á sama tíma árið áður.
  
Útflutningur
Fyrstu þrjá mánuði ársins 2012 var verðmæti vöruútflutnings 5,8 milljörðum eða 3,9% meira á föstu gengi¹ en á sama tíma árið áður. Iðnaðarvörur voru 53,5% alls útflutnings og var verðmæti þeirra 1,3% minna en á sama tíma árið áður. Sjávarafurðir voru 42,5% alls útflutnings og var verðmæti þeirra 25,2% meira en á sama tíma árið áður. Mest aukning varð í útflutningi sjávarafurða, aðallega á ferskum fiski og fiskimjöli.

Innflutningur
Fyrstu þrjá mánuði ársins 2012 var verðmæti vöruinnflutnings 8,0 milljörðum eða 6,7% meira á föstu gengi¹ en á sama tíma árið áður. Aukning á verðmæti innflutnings varð mest í eldsneyti.

¹ Miðað er við meðalgengi á vöruviðskiptavog. Á þann mælikvarða er meðalverð erlends gjaldeyris 4,3% hærra mánuðina janúar–mars 2012 en sömu mánuði fyrra árs.

Í mars 2012 var meðalverð erlends gjaldeyris 5,3% hærra en í mars árið áður.

Mánaðarlegar tölur um utanríkisverslun líðandi árs eru endurskoðaðar allt árið og því geta þær breyst með útgáfu nýrra mánaðartalna. Endanlegar niðurstöður fyrir hvert ár eru gefnar út á vormánuðum næsta ár á eftir.