Fluttar voru út vörur fyrir 61,5 milljarða króna fob í apríl 2021 og inn fyrir 72,6 milljarða króna cif (67,6 milljarða króna fob). Vöruviðskiptin í apríl, reiknuð á fob/cif-verðmæti, voru því óhagstæð um 11,2 milljarða króna. Vöruviðskipti í apríl eru því 4 milljörðum óhagstæðari en samkvæmt bráðabirgðatölum sem birtar voru í upphafi mánaðar. Skýrist sá munur nær eingöngu af auknu verðmæti í innflutningi á skipum sem nam alls 5 milljörðum í apríl.
Til samanburðar voru vöruviðskiptin reiknuð á fob/cif-verðmæti óhagstæð um 7,3 milljarða króna í apríl 2020 á gengi hvors árs fyrir sig. Vöruskiptajöfnuður í apríl 2021 var því 3,9 milljörðum óhagstæðari en á sama tíma fyrir ári. Vöruskiptajöfnuður síðustu tólf mánaða var óhagstæður um 154,3 milljarða króna sem er 27,5 milljörðum hagstæðari en á tólf mánaða tímabili ári fyrr.
Verðmæti útflutnings jókst um 5,6% á tólf mánaða tímabili
Verðmæti vöruútflutnings í apríl 2021 jókst um 14,1 milljarð króna, eða um 29,8%, frá apríl 2020, úr 47,3 milljörðum króna í 61,5 milljarða. Útflutningsverðmæti sjávarafurða jókst um 9,5 milljarða (53,5%), munar þar mestu um aukið verðmæti loðnu. Verðmæti útfluttra iðnaðarvara jókst um 2,6 milljarða króna eða 9,6% samanborið við apríl 2020 og munar þar mestu um aukið útflutningsverðmæti áls.
Verðmæti vöruútflutnings á tólf mánaða tímabili, frá maí 2020 til apríl 2021, var 648,7 milljarðar króna og hækkaði um 34,3 milljarða króna miðað við sama tímabil ári fyrr eða um 5,6% á gengi hvors árs.. Iðnaðarvörur voru 47,5% alls vöruútflutnings síðustu tólf mánaði og var verðmæti þeirra 1,5% meira en á tólf mánaða tímabili þar á undan. Sjávarafurðir voru 43,4% alls vöruútflutnings síðustu tólf mánuði en verðmæti þeirra jókst um 9,4% á milli tólf mánaða tímabila. Verðmæti útflutnings í fiskeldi jókst um 6,2 milljarða, eða 23,7%, á sama tímabili.
Verðmæti vöruinnflutnings jókst um 0,8% á tólf mánaða tímabili
Verðmæti vöruinnflutnings nam 72,6 milljörðum króna í apríl 2021 samanborið við 54,6 milljarða í apríl 2020. Verðmæti hrá- og rekstrarvara jókst um 24,5%, verðmæti bensíns og gasolía jókst um einn og hálfan milljarð frá því í apríl í fyrra og neysluvörur um tæpa tvo milljarða. Að auki var verðmæti innfluttra skipa rúmir fimm milljarðar sem er fjögurra milljarða aukning frá birtingu bráðabirgðatalna í byrjun mánaðar. Aðrir liðir tóku minni breytingum.
Verðmæti vöruinnflutnings síðustu tólf mánuði var 803,0 milljarðar króna og jókst um 6,7 milljarða króna miðað við tólf mánuði þar á undan eða 0,8% á gengi hvors árs fyrir sig. Aukningin á þessu tólf mánaða tímabili er mest í neysluvörum, hrá- og rekstrarvörum og fjárfestingarvörum en á móti er samdráttur í eldsneyti og flutningatækjum.
Hafa má í huga að gengisvísitala1 hækkaði um 10,1% á þessu tólf mánaða tímabili en gengið styrktist aftur á móti um 4,5% á milli apríl 2020 og 2021.
| Verðmæti út- og innflutnings á tólf mánaða tímabili | |||
| Milljarðar króna á gengi hvors árs | Maí 2019-apr 2020 | Maí 2020-apr 2021 | Breyting % |
| Útflutningur alls fob | 614,4 | 648,7 | 5,6 |
| Sjávarafurðir | 257,5 | 281,8 | 9,4 |
| Landbúnaðarvörur (þ.m.t. eldisfiskur) | 32,1 | 40,0 | 24,6 |
| Iðnaðarvörur | 303,8 | 308,4 | 1,5 |
| Aðrar vörur | 21,0 | 18,4 | -12,2 |
| Innflutningur alls cif | 796,3 | 803,0 | 0,8 |
| Matvörur og drykkjarvörur | 80,6 | 82,6 | 2,5 |
| Hrávörur og rekstrarvörur, ót.a. | 226,3 | 248,5 | 9,8 |
| Eldsneyti og smurolíur | 92,0 | 45,4 | -50,7 |
| Fjárfest.vörur (þó ekki flutn.tæki) | 167,8 | 186,2 | 11,0 |
| Flutningatæki | 115,1 | 97,8 | -15,0 |
| Neysluvörur ót.a. | 114,1 | 141,9 | 24,4 |
| Vörur ót.a (t.d. endursendar vörur) | 0,4 | 0,6 | 38,7 |
| Vöruskiptajöfnuður | -181,9 | -154,3 | |
1 Heimild: Seðlabanki Íslands- Gengisvísitala (Vísitala meðalgengis - viðskiptavog þröng).