Vísitala neysluverðs miðuð við verðlag í desember 2014 er 422,3 stig (maí 1988=100) og hækkaði um 0,31% frá fyrri mánuði. Vísitala neysluverðs án húsnæðis er 394,3 stig og hækkaði um 0,23% frá nóvember.

Flugfargjöld til útlanda hækkuðu um 14,3% (áhrif á vísitölu 0,17%), kostnaður vegna húsnæðis, hita og rafmagns hækkaði um 0,5% (0,13%) og verð á bensíni og olíum lækkaði um 2,4% (-0,10%).

Síðastliðna tólf mánuði hefur vísitala neysluverðs hækkað um 0,8% og vísitala án húsnæðis hefur lækkað um 0,4%. Undanfarna þrjá mánuði hefur vísitala neysluverðs lækkað um 0,1% sem jafngildir 0,3% verðhjöðnun á ári (1,4% verðhjöðnun fyrir vísitölu án húsnæðis).

Meðalvísitala neysluverðs árið 2014 var 421,1 stig, 2,0% hærri en meðalvísitala ársins 2013. Samsvarandi breyting var 3,9% árið 2013 og 5,2% árið 2012.

Meðalvísitala neysluverðs án húsnæðis árið 2014 var 395,4 stig, 0,8% hærri en meðalvísitala ársins 2013. Samsvarandi breyting var 3,8% árið 2013 og 5,3% árið 2012.

Vísitala neysluverðs samkvæmt útreikningi í desember 2014, sem er 422,3 stig, gildir til verðtryggingar í febrúar 2015. Vísitala fyrir eldri fjárskuldbindingar, sem breytast eftir lánskjaravísitölu, er 8.338 stig fyrir febrúar 2015.