Vísitala neysluverðs í apríl 2007 er 268,7 stig (maí 1988=100) og hækkaði um 0,60% frá fyrra mánuði. Vísitala neysluverðs án húsnæðis er 243,7 stig, hækkaði um 0,21% frá mars.

Kostnaður vegna eigin húsnæðis jókst um 2,5% (vísitöluáhrif 0,45%) og var það nær eingöngu vegna hækkunar markaðsverðs. Verð á fötum og skóm hækkaði um 5,5% (0,24%) þar sem ekki gætir lengur áhrifa af útsölum.  Þá lækkaði verð á mat- og drykkjarvörum um 0,9% (-0,12%) og koma þar meðal annars fram áhrif af niðurfellingu vörugjalds af nokkrum flokkum matvæla.

Síðastliðna tólf mánuði hefur vísitala neysluverðs hækkað um 5,3% en vísitala neysluverðs án húsnæðis um 3,2%. Fastskattavísitala neysluverðs hefur hækkað um 7,2% síðastliðna 12 mánuði. Undanfarna þrjá mánuði hefur vísitala neysluverðs hækkað um 0,7% sem jafngildir 2,7% verðbólgu á ári (2,6% verðhjöðnun fyrir vísitöluna án húsnæðis).

Vísitala neysluverðs í apríl 2007, sem er 268,7 stig, gildir til verðtryggingar í maí 2007. Vísitala fyrir eldri fjárskuldbindingar, sem breytast eftir lánskjaravísitölu, er 5.305 stig fyrir maí 2007.

Grunnur vísitölu neysluverðs er endurnýjaður í mars á hverju ári og byggist hann nú á þriggja ára meðaltali heimilisútgjalda samkvæmt útgjaldarannsókn Hagstofunnar árin 2003-2005. Árleg grunnskipti leiða til þess að ekki verða verulegar breytingar á skiptingu útgjalda frá einu ári til annars. Þá skal tekið fram að endurnýjun vísitölugrunnsins veldur ekki sem slík breytingum á vísitölunni milli mars og apríl.

Hinn 3. maí nk. verður gefið út hefti Hagtíðinda um vísitölu neysluverðs þar sem nánar verður fjallað um breytingar hennar undangengið ár.