Fjöldi lausra starfa á íslenskum vinnumarkaði á fyrsta ársfjórðungi 2020 var um 2.900 miðað við niðurstöður starfaskráningar Hagstofunnar. Niðurstöðurnar benda til þess að á sama tíma hafi um 215.100 störf verið mönnuð. Hlutfall lausra starfa var því rétt um 1,3%, sem er svipað og á fyrsta ársfjórðungi 2019 þegar hlutfall lausra starfa var 1,5%. Viðmiðunardagur starfaskráningar var 15. febrúar og svarhlutfall var 92%.
Rétt er að benda á að sökum þess að viðmiðunardagur ársfjórðungsins var um miðjan febrúar er líklegt að áhrif COVID-19 megi sjá í tölum starfaskráningar fyrir næsta ársfjórðungs.
Til þess að notendur geti fylgst með vísbendingum um áhrif COVID-19 á einstakar atvinnugreinar hafa veftöflur starfaskráningar að þessu sinni verið uppfærðar með niðurbroti fyrir atvinnugreinar. Einnig hafa sérstaklega verið teknar saman atvinnugreinarnar ferðaþjónusta og tengdar greinar og sjávarútvegur. Á þeim má sjá að hlutfall lausra starfa í ferðaþjónustu var 3,9% og 0,1% í sjávarútvegi á fyrsta ársfjórðungi 2020.
| Mæling | Gildi1 | Staðalvilla2 | Neðri mörk3 | Efri mörk3 |
| Fjöldi lausra starfa | 2.900 | 500 | 1.900 | 4.000 |
| Fjöldi starfa | 215.100 | 7.800 | 199.700 | 230.500 |
| Hlutfall lausra starfa | 1,3 | 0,2 | 0,9 | 1,8 |
1 Tölur eru námundaðar að næsta hundraði.
2 Staðalvilla mælingar vísar til breytileika í mælingu milli úrtaka.
3 Neðri og efri vikmörk mælinga vísa til öryggisbilsins í kringum meðaltalið. Í endurteknum úrtökum mun þýðistalan falla innan öryggisbilsins í 95% tilvika.