Atvinnuþátttaka 83,3%
Á þriðja ársfjórðungi 2015 voru 192.800 manns á vinnumarkaði sem jafngildir 83,3% atvinnuþátttöku. Frá þriðja ársfjórðungi 2014 hefur fólki á vinnumarkaði fjölgað um 2.400 og atvinnuþátttakan aukist um eitt prósentustig.

Atvinnuþátttaka kvenna á þriðja ársfjórðungi 2015 var 79,3% en karla 87,3%. Á þriðja ársfjórðungi 2014 var hlutfall kvenna á vinnumarkaði nánast það sama og nú eða 79,4% en hlutfall karla var 82,3%.
Á vinnumarkaði eða til vinnuaflsins teljast bæði þeir sem eru starfandi og atvinnulausir. Atvinnuþátttaka er hlutfall starfandi og atvinnulausra (vinnuafl) af mannfjölda 16-74 ára.

Hlutfall starfandi 80,4%
Á þriðja ársfjórðungi 2015 voru 186.000 manns starfandi eða 80,4% af mannfjölda. Frá þriðja ársfjórðungi 2014 til þriðja 2015 fjölgaði starfandi fólki þegar á heildina er litið um 3.200 manns og hlutfallið hækkaði um 1,3 prósentustig.

Hlutfall starfandi kvenna var 76,1% og starfandi karla 84,6%. Starfandi konum fjölgaði um 600 og körlum um 2.500 frá þriðja ársfjórðungi 2014. Hlutfall starfandi kvenna var þá 75,7% og starfandi karla 82,3%.

Atvinnuleysi 3,5%
Á þriðja ársfjórðungi 2015 voru að meðaltali 6.800 manns án vinnu og í atvinnuleit eða 3,5% vinnuaflsins. Atvinnuleysi mældist 4% hjá konum og 3,1% hjá körlum. Samanburður þriðja ársfjórðungs 2015 við sama ársfjórðung 2014 sýnir að atvinnulausum fækkaði um 900 manns og hlutfallið lækkaði um 0,7 prósentustig.

Langtímaatvinnuleysi
Af þeim sem voru atvinnulausir á þriðja ársfjórðungi 2015 voru að jafnaði 2.900 manns búnir að vera atvinnulausir í 2 mánuði eða skemur eða 42,9% atvinnulausra. Á þriðja ársfjórðungi 2014 höfðu 4.100 verið atvinnulausir í 2 mánuði eða skemur, sem þá var 53,3% atvinnulausra.

Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á þriðja ársfjórðungi 2015 höfðu um 1.400 manns verið langtímaatvinnulausir eða 20,6% atvinnulausra samanborið við 900 manns eða 11,8% atvinnulausra á þriðja ársfjórðungi 2014.

Á þriðja ársfjórðungi 2015 voru 0,7% af þeim sem voru á vinnumarkaði langtímaatvinnulausir sem er 0,3 prósentustigum hærra en á öðrum ársfjórðungi 2015 en þá var hlutfallið 0,4%. Á þriðja ársfjórðungi 2014 var hlutfallið 0,5%.

Atvinnulausir teljast þeir sem voru án atvinnu í viðmiðunarviku könnunarinnar, þ.e. höfðu hvorki atvinnu né voru í vinnu (í eina klukkustund eða lengur) sem launþegi eða sjálfstætt starfandi, eru að leita að vinnu og geta hafið störf innan tveggja vikna eða hafa fengið starf sem hefst innan 3 mánaða. Einstaklingar sem eru ekki í vinnu en eru í námi flokkast atvinnulausir ef þeir uppfylla skilyrðin hér að ofan. Fólk telst vera starfandi ef það hefur unnið eina klukkustund eða meira í viðmiðunarviku könnunar eða verið fjarverandi frá starfi sem það gegnir að öllu jöfnu.

Hagtíðindi
Þessar niðurstöður eru meðal efnis í nýju hefti Hagtíðinda um vinnumarkað á þriðja ársfjórðungi 2015.

Vinnumarkaður á 3. ársfjórðungi 2015 - Hagtíðindi

Talnaefni