Samkvæmt Vinnumarkaðsrannsókn Hagstofu Íslands voru að jafnaði 197.300 manns á aldrinum 16-74 ára á vinnumarkaði í ágúst 2015, sem jafngildir 84,3% atvinnuþátttöku. Af þeim voru 189.800 starfandi og 7.500 án vinnu og í atvinnuleit. Hlutfall starfandi af mannfjölda var 81,1% og hlutfall atvinnulausra af vinnuafli var 3,8%. Samanburður mælinga fyrir ágúst 2014 og 2015 sýnir að atvinnuþátttaka jókst um 1,3 prósentustig og hlutfall starfandi fólks af mannfjölda gerði það einnig eða um 2 stig. Atvinnuleysi dróst hins vegar saman um 0,9 prósentustig frá því í ágúst 2014, úr 4,7% í 3,8%.

Flæðirit – Vinnumarkaður 16-74 ára ágúst 2015

Samtala undirliða þarf ekki að koma heim við heildartölur vegna námundunar.

Árstíðaleiðrétt atvinnuleysi 4,2% í ágúst
Samkvæmt árstíðaleiðréttingu var fjöldi fólks á vinnumarkaði 195.300 í ágúst 2015 sem jafngildir 83,7% atvinnuþátttöku, sem er 1,8 prósentustigum hærri en hún var í júlí. Fjöldi atvinnulausra í ágúst var samkvæmt árstíðaleiðréttingu 8.200 sem er aukning um 500 manns frá því í júlí. Hlutfall atvinnulausra jókst úr 4% í júlí í 4,2% í ágúst. Leiðrétt hlutfall starfandi fólks í ágúst 2015 var 80,2%, sem er aukning um 1,6 prósentustig frá því í júlí. Þegar horft er til síðustu sex mánaða þá sýnir leitni vinnuaflstalna að atvinnuleysi lækkar lítillega eða um 0,1 prósentustig og um 0,4 stig á síðustu tólf mánuðum. Hlutfall starfandi síðustu sex mánuði hefur aukist um 0,7 prósentustig og um eitt stig síðustu tólf mánuði.

Framkvæmd og aðferð
Mælingar sýna að íslenskur vinnumarkaður breytist reglulega í tilteknum mánuðum og stafar breytileikinn af ýmsum árstíðabundnum þáttum, eins og sjá má á myndunum hér að framan. Árstíðaleiðrétting er tölfræðileg aðferð sem leitast við að aðgreina árstíðabundnar sveiflur frá óreglulegum breytingum. Árstíðaleiðréttingin gerir samanburð á milli samliggjandi mánaða mun raunhæfari og segir betur um hvert tölurnar stefna. Vegna eðli árstíðaleiðréttinga hafa nýjar mælingar áhrif á alla tímaröðina. Hagstofa Íslands notar Tramo-Seats aðferð við árstíðaleiðréttingu. 

Ágúst 2015 nær til fjögurra vikna, frá 3. til 30. ágúst. Úrtakið var 1.225 einstaklingar á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.187 einstaklingar. Alls fengust nothæf svör frá 899 einstaklingum sem jafngildir 75,7% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,3, hlutfall starfandi ±2,5 og atvinnuleysi ±1,4. Allar fjöldatölur eru afrúnaðar að næsta hundraði.

Talnaefni