Atvinnuleysi 4,4% í júlí 2012

Samkvæmt Vinnumarkaðsrannsókn Hagstofu Íslands voru í júlí 2012 að jafnaði 189.700 manns á vinnumarkaði. Af þeim voru 181.400 starfandi og 8.400 án vinnu og í atvinnuleit. Atvinnuþátttaka mældist 84,5%, hlutfall starfandi 80,8% og atvinnuleysi var 4,4%. Atvinnuleysi hefur minkað um 1 prósentustig frá því í júlí 2011 en þá var atvinnuleysi 5,4%. Atvinnuleysi júlí 2012 var 5,8% á meðal karla miðað við 5,5% í júlí 2011 og meðal kvenna var það 2,8% miðað við 5,4% í júlí 2011.

Atvinnulausir teljast þeir sem voru án atvinnu í viðmiðunarviku könnunarinnar, þ.e. höfðu hvorki atvinnu né voru í vinnu (í eina klukkustund eða lengur) sem launþegi eða sjálfstætt starfandi, eru að leita að vinnu og geta hafið störf innan tveggja vikna eða hafa fengið starf sem hefst innan 3 mánaða. Einstaklingar sem eru ekki í vinnu en eru í námi flokkast atvinnulausir ef þeir uppfylla skilyrðin hér að ofan.

Flæðirit – Vinnumarkaður júlí 2012

Árstíðaleiðrétt atvinnuleysi 5,8%

Árstíðaleiðréttur fjöldi atvinnulausra í júlí 2012 var 10.600 eða 5,8% en var 11.000 eða 6,1% í júní. Fjöldi starfandi var 171.900 í júlí 2012 eða 76,8% sem er sami fjöldi og var starfandi í júní 2012. Leitni árstíðaleiðréttingar á atvinnuleysi sýnir hægfara þróun niður á við og að atvinnuleysi hefur nánast staðið í stað undanfarna mánuði.

Framkvæmd

Júlí 2012 nær til fjögurra vikna, frá 2. til 29. júlí. Úrtakið í júlí var 1.199 manns á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.177 einstaklingur. Alls fengust nothæf svör frá 969 einstaklingum sem jafngildir 82,3% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,3% og atvinnuleysi ±1,4%. Allar fjöldatölur eru afrúnnaðar að næsta hundraði.