Samkvæmt vinnumarkaðsrannsókn Hagstofu Íslands voru að jafnaði 202.800 manns á aldrinum 16–74 ára á vinnumarkaði í mars 2017, sem jafngildir 84,9% atvinnuþátttöku. Af þeim voru 199.300 starfandi og 3.400 án vinnu og í atvinnuleit. Hlutfall starfandi af mannfjölda var 83,4% og hlutfall atvinnulausra af vinnuafli var 1,7%. Samanburður mælinga fyrir mars 2016 og 2017 sýnir að atvinnuþátttaka jókst um 3,1 prósentustig. Fjöldi starfandi jókst um 15.500 manns og hlutfall starfandi af mannfjölda um 4,7 stig. Atvinnulausum fækkaði um 3.800 manns og hlutfall þeirra af vinnuaflinu lækkaði um 2,1 stig.

Þegar tölur um vinnuafl eru skoðaðar þá hefur atvinnuleysi ekki mælst jafn lágt í Vinnumarkaðsrannsókn Hagstofu Íslands síðan í nóvember 2007 þegar atvinnuleysi mældist 1,3%.

Flæðirit — Vinnumarkaður 16–74 ára mars 2017

Samtala undirliða þarf ekki að koma heim við heildartölur vegna námundunar.

Árstíðaleiðrétt atvinnuleysi 1,6% í mars
Íslenskur vinnumarkaður sveiflast reglulega milli mánaða vegna árstíðabundinna þátta. Samkvæmt árstíðaleiðréttingu var fjöldi fólks á vinnumarkaði 201.700 í mars 2017 sem jafngildir 84,7% atvinnuþátttöku, sem er aukning um 0,9 prósentustig frá febrúar 2017. Fjöldi atvinnulausra í mars var samkvæmt árstíðaleiðréttingunni 3.200 og hefur fækkað um 2.700 manns frá áætluðum fjölda atvinnulausra í febrúar. Hlutfall atvinnulausra lækkaði því á milli febrúar og mars 2017 um 1,4 stig, úr 3% í 1,6%. Leiðrétt hlutfall starfandi fólks í mars 2017 var 83,3%, sem er tveim stigum hærra en í febrúar. Þegar horft er til síðustu sex mánaða þá sýnir leitni vinnuaflstalna að atvinnuleysi hefur lækkað um 0,3 prósentustig, en á síðustu tólf mánuðum hefur það lækkað um 0,6 stig. Hlutfall starfandi síðustu sex mánuði hefur einnig hækkað eða um 0,3 stig, en aftur á móti aukist um 1,2 stig þegar horft er til þróunar síðustu tólf mánaða. 

Framkvæmd
Mars 2016 nær til fimm vikna, eða frá 27. febrúar til 2. apríl 2017. Úrtakið var 1.513 einstaklingar á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.480 einstaklingar. Alls fengust nothæf svör frá 1.034 einstaklingum sem jafngildir 69,9% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,1 stig, hlutfall starfandi ±2,2 stig og og atvinnuleysi ±0,9 stig. Allar fjöldatölur eru afrúnaðar að næsta hundraði.

Talnaefni