Samkvæmt vísitölu launakostnaðar hækkaði heildarlaunakostnaður á öðrum ársfjórðungi 2007 um 0,7% í verslun og ýmissi viðgerðarþjónustu (G) frá fyrri ársfjórðungi en lækkaði í byggingarstarfsemi og mannvirkjagerð (F) um 2,7%, í samgöngum og flutningum (I) um 1,9% og í iðnaði (D) um 0,1%.

Á sama tímabili lækkaði heildarlaunakostnaður án óreglulegra greiðslna um 0,8 % til 3,4%, mest í byggingarstarfsemi og mannvirkjagerð (F) en minnst í verslun og ýmissi viðgerðarþjónustu (G). Vísitala heildarlaunakostnaðar án óreglulegra greiðslna er ólík vísitölu heildarlaunakostnaðar að því leyti að hún tekur ekki tillit til greiðslna sem ekki eru gerðar upp á hverju útborgunartímabili s.s. orlofsuppbótar.

Árshækkun heildarlaunakostnaðar frá öðrum ársfjórðungi 2006 var á bilinu 6,5% - 11,3%, mest í  iðnaði (D) en minnst í verslun og ýmissi viðgerðarþjónustu (G).

Vísitala launakostnaðar, sem gefin er út ársfjórðungslega, sýnir breytingar á launakostnaði á vinnustund. Um er að ræða kostnaðarvísitölu sem ekki er leiðrétt fyrir breytingum í samsetningu vinnuafls og vinnustunda. Breytingar á vísitölu launakostnaðar geta því endurspeglað verðbreytingu vinnustundar, breytt hlutfall yfirvinnustunda, aukið hlutfall vinnuafls með há/lág laun eða samspil umræddra þátta.