Hagstofa Íslands hefur í dag gefið út birtingaráætlun sína fyrir árið 2019. Útgáfa birtingaráætlunar er í samræmi við verklag við hagskýrslugerð sem mótast hefur á alþjóðavettvangi og tryggir jafnan aðgang að opinberum hagtölum. Sem fyrr mun Hagstofan gefa út fréttatilkynningu verði breytingar á birtingaráætluninni í eftirtöldum flokkum:
- Vísitala neysluverðs
- Vísitala byggingarkostnaðar
- Landsframleiðsla
- Ársfjórðungslegar vinnumarkaðstölur
- Utanríkisverslun
- Mánaðarleg launavísitala (þ.m.t. vísitala greiðslujöfnunar)
Dagsetningar næstu 10 almanaksdaga á áætluninni eru staðfestar og taka ekki breytingum nema gefin sé út fréttatilkynning um það. Aðrar dagsetningar á birtingaráætluninni geta tekið breytingum.
Birtingar Hagstofunnar eru gerðar aðgengilegar öllum notendum samtímis kl. 9.00 að morgni birtingardags. Notendur geta fengið sendar tilkynningar um nýjar fréttir með tölvupósti skrái þeir sig í áskriftarþjónustu Hagstofunnar.