Haldið er upp á Evrópska tölfræðidaginn í dag, fimmtudaginn 20. október, en markmiðið með deginum er að vekja athygli á þýðingu og mikilvægi evrópskra hagtalna fyrir samfélög álfunnar og ekki síst almenna borgara.
Hagstofa Íslands sendir frá sér myndskeið í tilefni dagsins þar sem varpað er ljósi á það hvernig verðbólga hefur áhrif á líf almennings en há verðbólga hefur eins og þekkt er herjað á heimsbyggðina á undanförnum mánuðum.
Hagstofur Evrópuríkja hafa á undanförnum áratugum unnið náið saman í gegnum Evrópska hagskýrslusamstarfið sem snýst einkum um það að samræma aðferðir og mælingar svo mögulegt sé að bera þær saman á milli landa.
Með áreiðanlegum tölfræðilegum upplýsingum er rennt stoðum undir lýðræðislega umræðu og stjórnvöldum, fyrirtækjum og einstaklingum gert auðveldara að taka upplýstar ákvarðanir um framtíðina.