Flestir eignast fyrstu eign fyrir þrítugt

Síðast uppfært: 14. október 2020

Hlutfall einstaklinga af meðalmannfjölda sem eignast sitt fyrsta íbúðarhúsnæði fer hækkandi frá 18 ára aldri og nær hámarki í kringum 26 til 28 ára aldur en fer þá aftur lækkandi ef skoðaður er aldurshópurinn á milli 18 og 34 ára. Árið 2019 var hlutfall þeirra sem eignuðust fyrstu íbúðareign á aldrinum 25-33 ára lægra en tvö árin á undan.

Á árunum 2017-2019 var hlutfall þeirra sem eignast fyrstu eign svipað eftir kyni. Ef hlutfallið er skoðað eftir aldri og kyni má sjá að það er hæst hjá konum á 25.-28. aldursári. Í því samhengi er áhugavert að benda á að meðalaldur kvenna sem eignast sitt fyrsta barn er um 28 ár og er því mögulegt að það tengist stofnun heimilis ( Meðal-, mið og tíðasti aldur mæðra og feðra 1961-2019. px-tafla)

Af þeim sem eignuðust sína fyrstu eign árið 2018 voru 72,2% sem eignuðust hana með öðrum en 27,8% sem stóðu ein að eigninni. Af þeim sem eignuðust sína fyrstu eign einir voru 60,2% karlar en 39,8% konur.

Séu þeir sem eignuðust sína fyrstu fasteign árið 2018 skoðaðir út frá kyni og menntunarstigi á kaupdegi sést að 39,2% karla með grunnskólamenntun eignuðust fasteign einir en einungis 15,8% kvenna. Hlutfallið jafnast með hærra menntunarstigi þannig að 27,7% karla með háskólamenntun voru einir eigendur og 24,0% kvenna.

Talnaefni

Fyrsta eign einstaklinga 14102020 (xlsx)

Lýsigögn

Gögnin ná til allra einstaklinga sem voru á aldrinum 18-34 ára á kaupdegi og voru skráðir í þjóðskrá, voru í fyrsta sinn með skráða eign með kaupdag á tímabilinu 2017-2019 samkvæmt fasteignaskrá og eignuðust íbúðarhúsnæði, sem að lágmarki var tilbúið til innréttingar, einir eða með öðrum með annað hvort 50% eða 100% eignarhlutfall.

Ekki er hægt að gera greinarmun á fasteignarkaupum og erfðarmálum.

Menntunarstig tekur mið af menntunargögnum Hagstofunnar sem ná aftur til loka ársins 2018. Gögnin eru greind út frá hæsta menntunarstigi á kaupdegi. Menntunarstaða er flokkuð eftir ÍSMENNT2011-flokkunarkerfinu (pdf).