Árið 2023 fluttust 6.790 fleiri til Íslands en frá landinu. Það eru nokkuð færri en metárið 2022 þegar aðfluttir umfram brottflutta voru 8.660. Flutningsjöfnuður hefur verið hár síðustu tvö ár en næst þeim kemur árið 2017 þegar rúmlega 7.900 fleiri fluttust til landsins en frá því.
Á síðasta ári fluttust 21.561 til landsins og er það næstmesti fjöldi síðan mælingar hófust en fjöldinn var hærri árið 2022 eða 22.209. Þá fluttust 14.771 frá landinu árið 2023 og hafa aldrei jafnmargir flust frá landinu á einu ári.
Ef einungis er litið til erlendra ríkisborgara var flutningsjöfnuður 7.004 manns og hefur hann einungis tvö ár verið meiri á einu ári. Árið 2022 var flutningsjöfnuður erlendra ríkisborgara 9.286 og árið 2017 var hann 7.326. Flutningsjöfnuður á meðal íslenskra ríkisborgara var neikvæður en brottfluttir voru 214 fleiri en aðfluttir árið 2023. Flutningsjöfnuður íslenskra ríkisborgara var einnig neikvæður árið 2022 um 526.
Flestir íslenskir ríkisborgarar fluttust til Danmerkur
Af þeim 5.154 íslensku ríkisborgurum sem fluttu af landi brott árið 2023 fóru 3.708 til Danmerkur, Svíþjóðar eða Noregs. Flestir fluttu til Danmerkur, eða 2.071, en næst flestir til Svíþjóðar eða 1.132. Flestir aðfluttir íslenskir ríkisborgarar komu einnig frá þessum löndum eða 3.392 af 4.940. Flestir komu frá Danmörku eða 1.666.
Flestir erlendir ríkisborgarar fluttust á sama tíma til Póllands eða 2.558 af 9.617. Þaðan komu líka flestir erlendir ríkisborgarar á síðasta ári eða 4.192 af 16.621. Næst flestir erlendir ríkisborgarar fluttust frá Úkraínu árið 2023 eða 1.657 manns.
Rúmlega 38% aðfluttra og tæplega 40% brottfluttra á aldursbilinu 20–29 ára Eins og síðustu ár var fjölmennasti hópur aðfluttra og brottfluttra árið 2023 á aldrinum 20–29 ára. Tæplega 40% brottfluttra var á þessu aldursbili og einnig rúmlega 38% aðfluttra. Af einstökum árgöngum voru 24 ára einstaklingar fjölmennasti hópurinn af brottfluttum, eða 732, sem og fjölmennasti hópurinn af þeim sem fluttust til landsins eða 982.
Hagstæðasti flutningsjöfnuðurinn innanlands var á Suðurlandi
Þegar aðeins er horft til flutninga innanlands á milli landshluta voru þrír landshlutar með hagstæðan flutningsjöfnuð árið 2023. Flutningsjöfnuður var hagstæðastur á Suðurlandi en þangað fluttu 462 umfram brottflutta frá öðrum landshlutum. Þar á eftir kom Vesturland með flutningsjöfnuð upp á 186. Einnig var flutningsjöfnuður hagstæður á Norðurlandi eystra eða 138. Í öðrum landshlutum var flutningsjöfnuður neikvæður vegna innanlandsflutninga. Óhagstæðastur var hann á Suðurnesjum (-380), höfuðborgarsvæðinu (-327), Norðurlandi vestra (-39), Vestfjörðum (-30) og Austurlandi (-10).
Árið 2023 var flutningsjöfnuður á milli landa jákvæður í öllum landshlutum þar sem aðfluttir frá öðrum löndum voru fleiri en brottfluttir úr landi. Langflestir þeirra 6.790 einstaklinga sem fluttust til Íslands, umfram brottflutta, settust að á höfuðborgarsvæðinu, eða 3.962, en einnig settist stór hópur að á Suðurnesjunum eða 1.405. Þegar litið er til flutninga, bæði innanlands og utan, voru allir landshlutar með jákvæðan flutningsjöfnuð árið 2023.
Aðferðir
Hagstofan metur búferlaflutninga annars vegar á grundvelli upplýsinga um breytingar á lögheimili í íbúaskrá Þjóðskrár og hins vegar á mati Hagstofunnar á búsetu einstaklinga, sjá greinargerð. Búferlaflutningar sem gerðir eru upp á grundvelli þjóðskrárupplýsingar eru miðaðir við skráningardag í þjóðskrá en ekki hvenær flutningur átti sér stað. Hins vegar er miðað við matdagsetningu Hagstofunnar þegar búferlaflutningur er metinn eftir aðferð Hagstofunnar. Þetta hefur gilt frá árinu 2011 en fyrir þann tíma var notast við upplýsingar um breytingar á lögheimili í þjóðskrá.
Þegar land sem flutt er til frá Íslandi er óþekkt er notast við upplýsingar um ríkisfang þegar um einstaklinga með erlent ríkisfang er að ræða en fyrir íslenska ríkisborgara er þeim varpað af handahófi til landa sem hafa skráðan flutning annara íslenskra ríkisborgara.
Talnaefni
Búferlaflutningar innanlands
Búferlaflutningar milli landa