Tilraunatölfræði
Gjaldþrot og virkni fyrirtækja - tt
Tilraunatölfræði um gjaldþrot breytt í hefðbundna útgáfu
Hagstofa Íslands hefur ákveðið að taka talnaefni um gjaldþrot og virkni fyrirtækja í almenna birtingu samhliða talnaefni fyrir gjaldþrot skráðra fyrirtækja. Talnaefni verður uppfært mánaðarlega og fréttatilkynning birt á ársfjórðungs fresti.
Frá og með 23. febrúar verður talnaefni uppfært mánaðarlega í eftirfarandi töflu: Gjaldþrot fyrirtækja með virkni á fyrra ári eftir mánuðum 2009-2021. Sjá nánari umfjöllun í frétt frá 23. febrúar 2021
Gjaldþrot og virkni fyrirtækja
Samantekt
Hagstofa Íslands gefur út tölur um gjaldþrot skráðra fyrirtækja í hverjum mánuði og birtast þær að jafnaði 30 dögum eftir að mánuði lýkur, en þá hefur stærstur hluti gjaldþrotabeiðna verið skráður í fyrirtækjaskrá Skattsins. Ljóst er að hluti fyrirtækja sem tekin eru til gjaldþrotaskipta hafa haft lítil umsvif síðustu misseri. Til að varpa betri mynd á hvaða áhrif gjaldþrot hefur fyrir vinnumarkað og efnahagslíf eru hér birtar upplýsingar um meðalfjölda launþega og veltu samkvæmt virðisaukaskattskýrslum á síðasta heila rekstrarári áður en fyrirtæki var tekið til gjaldþrotaskipta.
Lýsing
Gjaldþrot eru skráð í fyrirtækjaskrá Skattsins í kjölfar þess að auglýsing um gjaldþrotabeiðni er birt í Lögbirtingablaðinu. Þar sem hluti gjaldþrotabeiðna kemur til vegna fyrirtækja sem ekki hafa verið virk í einhver ár, eða jafnvel aldrei (s.s. vegna uppsafnaðs útvarpsgjalds), gefur fjöldi gjaldþrota skráðra fyrirtækja ekki endilega rétta mynd af áhrifum þeirra á vinnumarkað og efnahagslíf. Því eru upplýsingar um gjaldþrotabeiðnir skv. fyrirtækjaskrá Skattsins keyrðar saman við tímanlegustu rekstrarupplýsingar árið fyrir gjaldþrot, meðalfjölda launþega og veltu samkvæmt virðisaukaskattskýrslum.
Markmið
Vonast er til að birting á upplýsingum um virkni þeirra fyrirtækja sem tekin eru til gjaldþrotaskipta gefi áreiðanlegri fyrstu mynd af áhrifum gjaldþrota á vinnumarkað og efnahagslíf en unnt er að fá af fjölda gjaldþrotabeiðna skráðra fyrirtækja.
Um 3100 launamenn störfuðu hjá fyrirtækjum sem urðu gjaldþrota árið 2020
Síðast uppfært: 27. janúar 2021
Samtals voru 28 fyrirtæki, sem skráð voru í fyrirtækjaskrá Skattsins, tekin til gjaldþrotaskipta í desember síðastliðnum. Af þeim voru 22 með virkni á fyrra ári, það er annað hvort með launþega samkvæmt staðgreiðsluskrá eða veltu samkvæmt virðisaukaskattskýrslum, 35% færri en í desember 2019.
90 fyrirtæki með virkni á fyrra ári voru tekin til gjaldþrotaskipta á síðasta ársfjórðungi 2020 (okt-des), 28% færri en á sama tímabili árið 2019 þegar þau voru 125. Þar af voru 24 í byggingarstarfsemi og mannvirkjagerð (38% fækkun), 12 í heild- og smásöluverslun og viðgerðum á vélknúnum ökutækjum (48% fækkun), 25 í einkennandi greinum ferðaþjónustu (39% fjölgun) og 29 í öðrum atvinnugreinum (36% fækkun). Fyrirtæki sem tekin voru til gjaldþrotaskipta á síðasta ársfjórðungi 2020 höfðu um 657 launamenn að jafnaði árið áður. Í byggingarstarfsemi og mannvirkjagerð voru þeir um 99 sem er 61% fækkun frá sama tímabili 2019. Í einkennandi greinum ferðaþjónustu var meðalfjöldi launamanna fyrirtækja, sem tekin voru til gjaldþrotaskipta á fjórða ársfjórðungi, um 301 sem var um 54% fjölgun frá sama tímabili 2019.
380 fyrirtæki með virkni á fyrra ári voru tekin til gjaldþrotaskipta á árinu 2020, en það er 9% fjölgun frá 2019 þegar þau voru 350. Þar af voru 111 í byggingarstarfsemi og mannvirkjagerð (16% fjölgun), 60 í heild- og smásöluverslun og viðgerðum á vélknúnum ökutækjum (2% fækkun), 92 í einkennandi greinum ferðaþjónustu (48% fjölgun) og 117 í öðrum atvinnugreinum (11% fækkun). Fyrirtæki sem tekin voru til gjaldþrotaskipta á árinu 2020 höfðu um 3.121 launamenn að jafnaði árið áður. Í byggingarstarfsemi og mannvirkjagerð voru þeir um 965 sem er 61% fjölgun frá 2019. Í einkennandi greinum ferðaþjónustu var meðalfjöldi launamanna um 1.067 sem er um 46% fækkun frá meðalfjölda launamanna gjaldþrota fyrirtækja árið 2019 þegar þeir voru 1975. Hér hefur nokkur áhrif að WOW air varð gjaldþrota í mars 2019.
Talnaefni
Gjaldþrot og virkni fyrirtækja eftir mánuðum 2009-2020 270121 (xlsx)
Upplýsingar um gjaldþrot skráðra fyrirtækja er að finna í töflunni: Gjaldþrot fyrirtækja eftir mánuðum og bálkum atvinnugreina 2008-2020
Lýsigögn
Gjaldþrot og virkni fyrirtækja - tt
Nánari upplýsingar eru veittar í síma 528 1260. Netfang: fyrirtaekjatolfraedi@hagstofa.is